廟街小食 (已搬遷) 新店位置

個幾月來日日行鬼咁遠先有巴士搭，好在發現了這間勁好味的「廟街小食」，咩都抵番晒！呢幾日巴士又改左我本應唔使再去油麻地，我都係照行去，因為實在太好食喇！個人最愛燒雞肶($15)、燒雞全翼($10)、燒雞中翼($10)&燒羊肉($8)，入晒味燒雞翼我鍾意食嘛。早幾日見有大條秋刀魚($13)，又係正到爆，呢類雪藏魚難整得好，哈，呢檔野又竟然燒得咁好食，入味唔乾柴又唔腥，我食到冇晒醬叫佢添又快手，正！仲有加分位係佢有幾個烤爐，唔使點等好快有得食，今晚嘆完燒豆腐($8)&燒雞翼尖($6)，條秋刀魚就啱啱燒好喇！食到忘晒形完全忘記身處油麻地鴉打街，忘形嘆緊之際有幾件洋妞問我Can U speak English? How much呢呢呵呵咩咩差，即指住老板話He can speak English，咪鬼阻住我食好野嘛！咱們係國際之都香港喎，邊個香港人唔吹得幾咀粵英普先得架。 日日食好味燒烤串，實在都好驚爆瘡，貼住就有檔即搾果汁，買杯潤潤先，$18蚊夠大杯生果新鮮冇腐味，正！