菊月町 (已搬遷) 新店位置

女朋友帶咗我嚟一間位於觀塘同牛頭角之間嘅小店食鐵板燒廚師發辦。未開始食鐵板燒之前已經有個好興奮嘅消息，就係我哋咁啱撞正七月嘅感謝祭，萬事堂食嘅客人每位可以獲得清酒一支，揀隻靚杯嘆清酒先。第一道菜係原條燒香魚。師傅將香魚嘅表面煎到好香脆，而且呢款魚嘅骨亦都唔難挑，啖啖香甜嘅魚肉再加埋用酸青瓜絲一齊食，好開胃。師傅係鐵板上面放上一個鍋，原來係準備熱油炸金鯛魚。揸過嘅金鯛魚魚鱗會翹起，變得好脆，下面嘅魚肉就好紮實，勁好食。第三道菜係一個超豪華炒蛋，用上芝士，海膽，龍蝦肉一齊炒，全部食材味道超夾。接住落嚟係薄燒和牛，師傅將和牛扒燒到大概五成熟，外層焦香裏面保持粉嫩，完全入口即溶。然後就有考師傅功力嘅櫻花蝦炒飯，炒飯粒粒分明夠乾身，加埋櫻花蝦同埋蔥粒，簡單嘅美味。仲有炒雜菜，入面有紅蘿蔔，椰菜，芽菜，等等。甜品係令我最驚喜嘅部份。師傅將一直用來放燒好嘅食物嘅麵包，加上牛油同埋糖變身成又甜又脆嘅焦糖多士，真係估佢唔到！呢度雖然位置偏僻，但係食物嘅質素同味道絕對唔差過一啲好出名嘅鐵板燒店，好值得行多兩步嚟試吓。