望住張order紙，好多台灣經典美食都有，包括：魯肉飯、麻醬麵、紅燒牛肉麵、蚵仔煎、甜不辣等。而飲品除咗大路嘅珍珠奶茶，估唔到連愛玉都有。叫嘢食都忍唔住用台灣口音國語講：「麻煩你！」
藥燉排骨：一鍋上嘅藥燉排骨，上枱一刻好香藥材味呀！份量都唔算少，大概都有6件排骨，而每件排骨都好入味，一啲都唔韌，鬆嫩筋軟仲好入味！成㷛湯一啲都唔馬虎，仲有好濃郁嘅當歸味，就算唔好藥材嘅姊妹們都請放心，味道甘香唔苦，值得一試！
滷水拼盤（豆干、牛肚、雞翼）：拼盤可自行挑選三款材料，我哋就揀咗豆干、牛肚同雞翼，最入味首選係豆干，好味呀；其次牛肚都好淋，但滷香味相對較淡；而雞翼味道就相對普通，好似唔太入味。
麻油雞：同樣係原煲上嘅麻油雞，麻香味十足，雞肉仲要係雞脾添，雖然雞肉好嫩滑，不過味道就好似差少少，如果入味啲就更好！
古法滷肉飯（小）：唔好問滷肉飯肥唔肥？！怕肥就唔好食滷肉飯！滷肉飯當然要半肥瘦先好味架啦！呢度嘅滷肉飯，五花腩半肥半瘦啱啱好，入口仲唔會膩，有埋好香濃嘅肉汁撈飯真係正！
紅燒牛肉麵：食麵前一啖湯，係我哋一貫嘅做法！湯底香濃，但牛味唔太出，值得加許係牛肉牛筋份量足，牛肉牛筋都好腍滑，味道唔錯！面身又好吸湯汁，軟硬適中，都算唔錯。
珍珠奶茶：茶同奶配合得唔錯，茶夠香濃，奶夠細滑，不過，至愛珍珠嘅M佬就略嫌珠量較小。
