金西南米線

營業中

休息中

有次喺旺角搵晚飯，經過「金西南米線」，係以前係銅鑼灣成日食，原來開咗旺角分店，就入去試下。主打雲貴風味嘅小鍋米線，即叫即煮，啱晒鍾意食辣嘢嘅人！我叫咗鯊魚丸、鹵水豬肚酸辣小鍋米線，湯底香辣惹味，酸味開胃，辣度唔會死辣，幾順口。鯊魚丸彈牙，豬肚夠爽，份量唔少，最後飽到食唔晒。不過最驚喜一定係佢哋招牌「金獎腩肉」！我叫咗做涼拌米線，拼埋豬大腸同牛肝菌，涼拌麻香味好正，但重點係個腩肉，炆得夠腍又入味，脂肪位唔膩，瘦肉位又唔鞋，入口即溶，完全唔會覺得heavy，真係明白點解係鎮店之寶，推介！小食方面叫咗幾款：麻辣手撕雞啖啖肉又唔乾，麻味十足；椒鹽炸魚蛋外脆內彈，有少少九層塔香，幾有特色；炸皮蛋豆卜配甜酸醬，酸酸甜甜中和晒炸物嘅油膩感；而白烚菜心就中規中矩，解一解膩啱啱好。飲品方面就叫咗豆漿同罐裝椰汁馬蹄爽，豆漿唔太甜，有豆味；椰汁馬蹄爽就清涼解辣，一啖飲落去好爽！總括嚟講，「金西南米線」真係CP值高，味道夠地道，選擇多，服務都算快，特別係招牌腩肉，真係要encore。下次一定會再嚟幫襯，可能試埋佢哋其他辣鍋口味！