越泰 (已結業)

年幾前係上環返工記得食過哩間餐廳一兩次，不過印象中食物同服務質素都好一般，所以之後都冇再去過。今日過開哩頭同舊同事聚會。同事就帶左我去哩間餐廳。一心諗住見下舊同事，對食都不抱有太大期望，點知又驚喜地食到個唔錯既海南雞飯，雞同油飯既份量都好足料，雞肉肉質又好滑好嫩，個醬汁又甜甜酸酸同個海南雞好配合。之後仲點左個泰式燒豬頸肉青木瓜沙律。個豬頸肉份量又係非常多，完全蓋過沙律部份。豬頸肉淋得黎又好爽口，燒到岩岩好👍🏼。青木瓜絲同紅蘿蔔絲粗幼適中，口感好，配上甜酸汁同帶有些少蝦乾味道，好開胃。冬陰公海鮮湯真係好大碗，兩個人好難先飲得哂。哩款冬陰公唔太辣，反而椰汁味重，加入海鮮烹煮，湯微辣帶鮮帶甜，唔錯。蜂蜜柚子茶好大杯😮。椰青好大個，超甜👍🏼。聽同事講最近轉左老闆，所以餐廳食物同服務都改善左。午飯同放工後哩到都多左人排隊等位。唔想等位既6點半前就好黎到喇。