媽咪隨意屋 (已結業)

餐廳主打泰式輕餐，有泰式粉麵飯、串燒、炸物、泰式特飲等既選擇。餐廳選址開揚，裝潢簡潔，設有大約十張枱凳，帶有絲絲溫馨既感覺。叫左豬牛一家親($48)，主食加$10有小食，亦可以加配飲品。一家親有豬肉片、豬肉丸、肥牛片、牛丸。肉片非常大片，而且丸物係手打而成，爽滑彈牙，值得一試。仲有d蘿蔔、炸豬皮點綴，令成豌麵配料十足。泰式船湯底超濃郁清甜，用左好多種泰式香料同豬骨熬製，而且主張無添加味精，令到吸湯既河粉味道升華，香口十足。主食加$10可以加配一份串燒/半份炸物，今次點左椒鹽一口豆腐(原價$25)，上面灑上大量蔥花同炸蒜，質感外脆內軟，而味道有少少似臭豆腐。炸蒜香口，食完成個口都係蒜味。主食亦都可以加配飲品，蜜桃梳打(原價$22)只係需要加$11，賣相一流，甜度適中，飲完感覺清新怡人。總括黎講，餐廳食物價錢適中，食物質素高，有主食亦有小食提供，外賣亦都好方便。