魚米家魚湯米線 (已搬遷) 新店位置

真係唔覺得好似其他食評講得咁差。尋晚成十點幾先去食，都仲有好多客。兩個人，叫o左一個魚旦米線餐，$36，包一杯飲品同炸餃子兩隻(或其他小吃)；另加一客$28魚腐米線撈，同埋$20七味豬爽肉。D魚旦幾彈牙，米線算滑，個湯底都飲到魚腥味，應該真係有落魚去煲，不過一定仲有味精；而且順德米線冇雲南煮法咁油膩，所以個魚湯幾清，唔錯。至於魚腐，小妹其實最怕食鯪魚，好在D魚腐咬落口都幾似食緊魚旦，完全唔覺有鯪魚骨同蛋味，都可以接受；不過米線撈冇o左個魚湯底，取而代之o既係D類似蠔油o既醬汁，冇魚湯咁好味。個豬爽肉都炸得幾鬆軟，帶咸同辣味，不過熱氣o左D。不過呢度賣o既食物多數唔係煎就係炸(包括魚腐在內)，如果怕肥怕熱氣o既似乎冇乜選擇。環境方面，真係同茶記冇乜分別；座得迫之餘，我尋晚仲見到有個阿伯食食下除o左對鞋響度"un un"腳，好噁心~~~>_<~~~~！！