大將 (已結業)

天寒地凍食火鍋就最開心, 最好仲係放題, 樣樣都可以食吓, 冇咁悶, 而且仲唔使就住就住!今日去咗將軍澳呢間大將, d食物好新鮮, 而且選擇都算多!  呢度係一人一鍋, 自己鍾意食乜就淥乜, 湯底可以自己話事! 湯底選擇都好多, 主要係日式湯底, 有辣有唔辣!  我同朋友分別揀咗〈麻辣味噌湯〉同〈雞白湯〉! 麻辣湯底一嚟都幾辣下, 但係真係幾惹味, 可以唔使再點醬, 鍾意食辣嘅可以試下!〈雞白湯〉就雞味濃郁!我地order咗〈澳洲和牛牛小排〉火鍋放題, 和牛牛小排質素相當唔錯, 仲有安格斯牛小排、嚴選Prime牛肩肉、特選牛肩肉等等都好掂! 除咗牛肉, 仲有雞肉豬肉同海鮮, 都係任你order! 當中我極力推介沙白, 係必點嘅! 沙白非常肥美鮮甜, 真係忍唔住encore! 仲有推介昆布漬雞肉, 超級嫩滑!另外喺自助食品區仲有好多款蔬菜、丸類、小食、前菜、熱食, 仲有軟雪糕機, 真係有得食又有得玩! 至於飲品都係包埋嘅, 除咗冷凍櫃入面嘅飲品, 仲有自助汽水機、咖啡機!