係旺角洗衣街行左一陣，我地就見到呢間叫「越滿」嘅小店。嗯…我地見咁耐無食過越南野，就一致決定要入去大快朵頤。
牆壁貼滿唔少趣緻圖案，有豬仔，雞仔，小農夫......充滿童真😍
雖然7點左右，店內已經有唔少客人，但侍應哥哥仍然肯安排我地4個人坐一張6人檯呀，真係好滾動！
坐檯旁邊有個玻璃櫃，展示各種越式食品，包括金邊粉，啤酒......
我地坐得舒適，自然有意慾食得「招積」!
好，係時候點菜喇!
蒜仔牛柳粒 $68
成碟牛柳粒一上檯已經誇啦啦！
濃濃蒜香，將7成熟嘅牛柳「鮮」氣毫無保留咁牽引出黎。
朋友大讚廚師炒工了得，令牛柳粒肉質彈牙，相當有嚼勁。
豬肉鮮蝦米紙卷 $45
米紙口感相當煙韌，食一啖已經體會當中嘅層次美。只係今次米紙裡面包嘅豬肉同蝦肉份量確係少咗啲，令人有種意猶未盡嘅感覺。
不過呢度配搭嘅魚露，味道唔係只得酸同甜; 重有一股淡淡嘅鮮味架。
值得一試!
越滿和牛湯河 $118
呢碗野就厲害喇，佢係由日本和牛，澳洲和牛，美國牛小扒，牛丸......組合而成。如果要我畀個名佢，我會講出三個字 -- 「牛魔王」。
老實講，我從來都無食過一款湯河，係由咁多唔同種類嘅牛肉混合而成。和牛嫩滑無比，牛丸爽口彈牙，牛小扒就肉厚多汁，岩哂所有鍾意食牛嘅朋友仔呀！
熱青檸水 $16
食咗咁多野，係時候要飲番杯野消滯。
估唔到杯青檸水竟然有3片檸檬片，平時飲開嘅都只係得2片架炸!
呷一口，淡淡檸檬香 -
!如是者，我地就為呢晚嘅「慰勞宴」畫上句號啦！
