就決定去尖沙咀The One 19樓Halan’s Bar and Restaurant
我地叫咗佢嘅Tasting Menu，任選三道菜
都係$788 /人，唔算貴
而呢度環境當然就一流啦，
對正維港靚景， 180度海景，仲有落地大玻璃，
無論係室內定室外都可以欣賞到香港嘅一流夜景
而室內就更加比人一種高貴同安靜嘅感覺，彷彿進入咗另一空間，非常舒服
講返食物，
前菜：
1️⃣北海道帶子他他配火龍果脆片、紅石榴蓉
呢款北海道帶子他他入口滑溜舒服，都算新鮮
加上酸酸甜甜嘅火龍果脆片，泰國紅石榴醬調味
食落就覺得更多層次，Fresh感倍增
2️⃣日本帝王蟹蛋泡沫配24個月法國康帝芝士脆片及海膽
呢款一聽個名就知係正嘢啦！
佢係大廚嘅得獎作品，食材靚料，用帝王蟹肉打做泡沫
口感食落似金華火腿，鹹鮮十足
海膽用咗北海道海膽，仲有魚子醬同24個月芝士脆片
將脆片駁落去混合泡沫一齊食，好有層次，Creamy得嚟亦好有儀式感
3️⃣煙燻海蜇蝦石榴巴馬火腿清湯蜆汁凍湯
質地睇落薄身，
但入口有好濃郁嘅煙燻金華火腿味，又估佢唔到喎！
海蜇蝦彈牙，蜆有刻意炙燒過，處理食材上都見得出好有心機
而配埋九層塔同脆米令味道變得更豐富
主菜：
4️⃣西班牙八爪魚配意式薯仔麵團
西班牙八爪魚燒得幾香，食落好有膠質，好軟熟，外皮仍然好焦脆，係好特別嘅texture
加上自家醃醍魚脆，酸甜又開胃
主食有意大利Gnocchi配上辣肉腸甜椒汁，甜甜辣辣咁，又飽肚又好食
5️⃣黑松露北非小米配和牛牛舌及牛小排
首先呢款嘅汁料都好抌本，係用咗鵝肝龍蝦汁同雞皮脆片嚟調味
而和牛牛舌烤肉，慢煮炮製，煮得非常軟熟，而且好入味
牛小排質比較有咬口，同樣好食到牛肉嘅濃香
黑松露北非小米索晒啲牛汁，好juicy
甜品：
6️⃣香檸檬芝士蛋糕配酸柑、楓糖漿，糖漬檸檬皮，碧根果曲奇
呢款芝士蛋糕就超級refreshing
檸檬同酸柑嘅配搭好突出到嗰種酸香
同時用咗貴價嘅碧根果，更能帶出烘焙嘅香氣，整體配搭好好，仲配咗個小小嘅雪葩
令人十分滿足
