茶位每位$15。收加一服務費。
餐前小食$15一小碟。
餐前小食係香辣雲耳。雲耳香脆小辣，有黑色同白色嘅雲耳。
黑松露鮮蝦餃 (特) $45
黑松露鮮蝦餃一客四粒，中間加配一粒迷你版嘅。餃皮都唔算厚。鮮蝦餃真材實料，真係有鮮蝦喺入面，爽脆彈牙。有微微嘅黑松露味，唔洗點醬食都可以。如果餃皮更加薄就更加好！
蟹籽燒賣皇 (大) $38
蟹籽燒賣皇一客四件大大粒，真材實料有大大粒蟹籽喺面，d 蝦滑令到粒燒賣都彈彈地牙，食落啖啖肉。
碧玉鮮蝦腸粉 (特) $45
碧玉鮮蝦腸粉一客兩條，切開左六份，擺盤好靚，服務員上枱先幫我哋倒豉油喺上面。最欣賞係每件腸粉都有一隻爽脆大蝦，好鮮甜啖啖肉，加左少少碧玉，似係瓜或者豆。腸粉皮唔會太厚或者係一pat野，夠滑。加左豉油夠哂味道。
蒜蓉鮮蝦春卷 (大) $38
蒜蓉鮮蝦春卷一客三大條，每條切開兩件。春卷皮好脆，擺耐左先食都仲脆。入面好多鮮蝦肉，加左適量蒜蓉又唔會喧賓奪主。另外上左豉油俾你點黎食。
南翔小籠包 (大) $38
南翔小籠包一客三件，每隻都用個傳統籠仔裝住。小籠包認真製作，下底用左塊甘筍片墊底，皮唔算厚而湯汁豐富，一口咬落去好好味。另上一兜黑醋加左好多薑蓉俾你自己加。
楊枝甘露 (大) $38
楊枝甘露用左個幾靚嘅玻璃兜上枱。材料豐富，有新鮮芒果粒，柚子肉，好多脆脆嘅西米粒，好有口感而味道唔錯。
香芒凍布甸 (大) $38
香芒凍布甸都好好味，甜度適中而有唔少新鮮芒果肉，另外上左兜花奶俾你加，我當然倒哂落去。
陳皮紅豆沙
食完仲有糖水送，今日係陳皮紅豆沙。作為一個免費贈送嘅糖水都唔錯。煲到起沙仲有粒粒紅豆食，唔過甜。
試左咁多點心，基本上全部質素都好好。座位舒適，枱同枱之間距離足夠，傾偈又唔嘈。每人$171，我覺得唔貴。
