御前大江戶日式料理 (已結業)

由於有四個五月之星生日，而我們又一直都好想去觀塘1亞太中心嘅「御前大江戶日式料理」食磯燒海鮮放題，同埋身邊有好多朋友去食過都話相當唔錯同埋成日都爆滿，所以我們一早打電話去預訂今晚食晚市放題！一去到安排好坐位之後，店員就攞咗以人數計嘅限量海鮮拼盤畀我們！一上碟我們見到個超新鮮豐富嘅海鮮拼盤嘅海鮮令到我們個個都嘩嘩聲，因所有海鮮例如活鮑魚、生蠔、大蝦同蟶子皇全部差唔多有一隻手掌咁大，真係超級大隻呀，另外仲有個蟹蓋燒，入面有蟹肉、蟹膏同鷄蛋，燒過之後夾埋一齊食，味道非常軟滑甘香！喺呢度用嚟點菜落單嘅唔係好似其他放題店咁寫紙，而係用平板電腦入單，真係好方便，而且又環保！雜錦刺身拼盤嘅刺身都相當新鮮，當中嘅赤貝係咁多款之中最正㗎，味道好鮮甜爽脆！壽司嘅款式種類都幾多，而且賣相非常精緻吸引，而且每件壽司同迷你海膽手卷飯嘅份量唔會好大件，唔會食幾件就會好快飽肚，真係值得一讚！除咗有主打嘅磯燒海鮮同刺身壽司之外，仲有自助區域有沙律、熱湯、卷物同雪糕雪條等等等等⋯⋯由於我們一早喺訂位嗰陣話有人生日，所以有個壽司蛋糕送，個蛋糕係用多件迷你壽司組合而成，好似喺日式壽司店擺放嘅陳列小模型咁，賣相超級趣緻可愛！