張公子

營業中

休息中

朋友經常嚟飲茶，表示食物質素好好，今次帶我去食晚飯小菜，又估唔到觀塘有間咁高質嘅中菜。餐廳有單點小菜之餘，亦有唔少套餐選擇。食物種類選擇多，我哋人少少，所以點咗幾個小菜試吓。張公子叉燒（$258）- 叉燒係招牌菜之一，外皮焦脆，內裡肉質鮮嫩多汁，入口即化。肉質好香，同蜜汁味道非常夾，真心好味。特別要讚餐廳提供咗個熱盤keep住叉燒嘅溫度，令叉燒入口熱辣辣，特別好食。艷影蝦球（$108）- 賣相非常吸引，蝦球的外層炸得酥脆，內裡的蝦肉超大，肉質鮮嫩彈牙，入口唔會過份油膩，非常美味。鮮腐竹蕃茄浸菜苗（$138）- 呢道絕對係清爽嘅素食之選，腐竹同菜苗，再加上蕃茄的酸甜味，好味又健康。翡翠筍殼魚球（$268）- 荀殼魚為主要材料，肉質鮮結實，入口啖啖肉，配以西芹及青紅蘿黃椒，口感多重。餐廳幾道小菜味道都相當唔錯，環境亦舒適好坐，枱與枱之間寬落，啱晒同屋企人或朋友晚飯傾偈。