六和冰室 (已改名) 查看

衆所周知，觀塘工廈好多隱藏美食店，今次呢間六合冰室就係其中一間。位於成業工業大廈地下，占地面積大，有好多卡位同圓檯，裝修以香港特色為主，餐廳光猛新净，主打麻辣鷄煲、火鍋、烤魚和小炒。老闆熱情推介招牌吊燒骨 $88，加入麥芽糖同腰果，既香脆又惹味，金沙骨keep到肉汁，好香甜，老闆無介紹錯！紅燒豆腐 $68，豆腐外層焦香酥脆，裏面仲係豆腐水嫩口感，豆腐沾滿紅燒醬汁，有多款菇類增加鮮味，另配有3棵白菜，呢道餸好豐富。今次叫左明爐招牌烤鱸魚 $268 酸菜味 BB辣。鱸魚好大條，本身已經炸到脆身，魚肉都已經熟左，不過可以慢慢加熱，吸收下酸菜湯嘅精華，會好味好多。食魚最緊要少骨，呢條鱸魚骨冇咩細骨，魚幾厚肉。配有紅薯粉，吸收曬湯底酸辣味，好惹味。可以加錢另配火鍋配料，但見到本身烤魚已有大量配菜，只加了烏冬。烤魚底部嘅配菜真係好多，有白蘿蔔、豆卜、酸菜、蓮藕、金針菇、萵荀等等。$28一杯特飲，分別嗌左洛神花茶同埋菠蘿青檸蜜，超大杯超抵飲。另加$30叫左自家制檸檬薏米水，清熱解渴，啱曬食烤魚時飲。