串過鷄 (已結業)

餐廳喺觀塘協和街，鄰近裕民坊新商場，過條馬路就到。店面叫「串過雞」應該係食串燒掛，冇錯係有串燒食嘅，但就唔只得串燒，食物種類相當豐富，而且價格都好親民！【泰式無骨雞飯】嫩滑嘅雞肉配個酸酸辣辣嘅醬汁非常惹味！配菜都非常豐富，除咗有耶菜仲有蕃茄洋蔥（沙律？）。【串燒】嚟到串燒店冇理由唔試吓串燒嘅！串燒全部即叫即燒，但都好快有得食。金菇肥牛卷：呢個配搭冇得輸！金菇肥牛嘅油香，多汁好味道！燒到微微焦香，再加埋啲辣椒粉，好正！紅燒五花腩：燒完嘅五花腩啲油大部分都迫晒出嚟，所以食落唔肥膩。【酥炸雞中翼】原本已經食飽飽，但見到隔離枱食酥炸雞中翼食得津津有味，於是加單試埋。五隻雞中翼大大件，賣相炸得好靚，個粉漿炸到金黃色脆卜卜，亦唔會太厚，入面雞肉就嫩滑多汁，火候控制得啱啱好！店舖細細，但食物種類好多，店員勤勞親切，見到佢哋一邊清楚食具一邊同街坊有傾有講，有幾個應該係成日幫襯嘅熟客。對住我第一次幫襯嘅顧客都親切咁介紹食物，真係小店先感受到呢啲人情味，食物簡單而美食，用心製作就已經足夠令人食得開心滿足。