芒果冰 (已結業)

氣溫回暖一段日子，又好彩未至於太熱，週末多返啲人走入西貢，搭船出去玩下，買下海鮮。喺西貢海旁，好多人以為全部都係海鮮酒樓，但其實行多幾步，都有唔少特色野食架。好似幾個月前，就有呢間 Ice Mango Cafe 開業，我呢個西貢街坊當然留意到，但近日先得閒拜會一下。餐廳對出就係無敵大海景，停泊左好多艇家嘅船，坐室外望住個海食飯，環境都唔錯，當然室內都有座位啦。漁夫籃賣相好吸引，木箱仲係我鍾意嘅淺藍色。裡面有一大條炸魚，兩隻炸蝦、炸蟹柳、魷魚圈同埋薯條。炸魚都幾厚肉，炸漿又薄又鬆脆又香口，唔錯喎；只係略嫌條魚濕左少少啦，但勝在嫩滑又夠魚肉香。炸蝦都好大隻，肉質爽脆，魷魚圈都好惹味，有驚喜嘅竟然係炸蟹柳，原來脆脆地咬落去帶絲嘅質感幾得意。聽講呢度嘅漢堡包都幾出名，用上澳洲漢堡嘅做法，麵包先搽上牛油再烘至外脆內軟，仲聞到陣陣麵粉香。漢堡扒係自家製，牛肉味極濃，厚身啖啖肉，燒到帶有焦香，夾埋上面塊半溶化嘅芝士，非常惹味啊。底下仲有大量清甜又惹味嘅洋蔥，番茄仔仲好多汁，生菜又爽脆。細蘑菇粒唔算十分多，但都夠晒滋味。飲品選擇都幾多，有好多款咖啡、朱古力、冰紅茶類，熱茶都有好多選擇，更有花茶及果茶，