齊柏林熱狗店 (嘉輝花園) (已結業)

店舖位於士美菲路大斜路住宅區，細細間，要啲眼力先睇到。附近得間糖水店同佢，肚餓又唔想行太遠就啱哂。去過幾次試咗幾隻唔同嘅熱狗，大過lkea嗰隻多多聲，貴少少，但比起其他熱狗店係人地一半價錢有多，非常之有良心。上面係士林原味熱狗，menu上有隻辣椒仔，話係條粗腸辣不過食落一啲都唔辣，不過酸瓜醬令咁大份嘅熱狗好開胃。下面係洋蔥圈熱狗，啲洋蔥圈好大件，擺咗一陣先食都脆卜卜，不過我要分開哂啲洋蔥圈食，因為擘大個口都塞唔哂包加腸加洋蔥圈一次過。試過最最最邪悪嘅一定係呢個辣肉醬芝士熱狗，兩樣配料加埋真係冇得頂！不過小鳥胃嘅人可能一個都食唔哂。之前嗰兩個熱狗食完都可以食埋個跟餐薯條，呢個食完要中場休息。