101手工小火鍋 (已結業) 查看

竟然有下午茶火鍋餐，湯底+2至4款餸+一款麵+一杯特飲，兩款餸$39, 三款$47, 四款$55。特飲推介盆栽特飲，好大杯又好味，只需加$8，另加肥牛$28有9塊。下午茶時間到5:45pm，趕到五點幾去的話甚至可當晚餐。湯底我要了蟲草養生湯，蟲草量算多，有紅棗、蕃茄、菜絲等。味道清淡得來夠味，亦不油膩，讚😊麵我要了台灣新竹米粉，爽口，份量好多，我5:30pm到當晚餐都夠飽。餸有好多款揀，我要了3餸，蟹粉包、日式芝士丸、貢丸，三者中我最推介蟹粉包，我原以為似蟹粉小籠包之類，原來個樣同日式芝士丸差不多，流心的，好好味，最好食。每份餸有兩粒。另加的$28肥牛中規中矩。加肥牛湯便自然會較肥，可按個人喜好追加。特飲一定推介加$8的盆裁特飲，好大杯好靚好好味。最欣賞是可選擇的餸，可以全選菜、豆卜、豆腐等，湯底有蕃茄湯，適合素食人士。如果食開快餐店如大家樂大快活，這是小清新，但就無咁多醬汁自己加，好處是清甜原味健康。