新澳咖啡餐室 (民泰街) (已結業)

因為實在太早食飯,十點幾左右就開始肚餓.一路都有留意呢間餐廳嘅裝修,見到已經開始咗宵夜時段,梗係即刻衝入去食啦.依度最特別嘅地方就係卡位後面嘅香港街景模型,大部分都係唐樓景,非常精細,連紅綠燈都識轉燈,如果帶小朋友來一定好開心.叫咗個頭抽乾炒豬扒意粉,話咁快就到.有一陣炒燶嘢嘅味道,但係其實冇燶到,可能係上一手炒落嘅嘢剩低啲鑊撈味.意粉用蔥,洋蔥同豬扒炒埋一堆,油同埋鹽都非常多.豬扒本身唔算醃得好濃味,仲食到豬肉味,而已質素唔差.但一聞到鑊撈嘅味道,真係有啲無胃口,但係始終啲意粉同豬扒冇燶到,叫人換又唔係咁好.另外檸檬茶叫咗少冰,但係冰就冇少到,變咗少糖,唔夠甜.食飽埋單先見收銀處寫明只收現金.當然好多茶餐廳,尤其係舊式嗰種,都係唔收八達通既.但係依間裝修靚靚哋,擺到明係想吸引年輕人嘅,連咁常用既八達通都唔收就有D唔方便喇.