譽小館 (已易手) 新餐廳

我阿婆係呢度地膽，今日佢就帶我嚟食好嘢。 原來彩園商場地下大裝修之後，多咗啲新食肆，其中一間就係譽小館。 佢話我知好多街坊捧場架，尤其係朝早，坐滿人添。點心紙一張睇晒：譽小館蝦餃皇$28四件，餡多，蝦肉又夠爽口。藥膳雞腳$26有當歸，煮得入味，雞腳夠晒腍。 個藥膳湯唔會太咸，又幾好飲喎。上湯鳯城水餃$38都夠大隻，不過有啲大啲有啲細啲，均勻度爭少少。沙律蝦春卷$26鮮蝦腐皮卷$26都係即炸，好脆口。馬荳糕$20上面加左層芒果啫喱，味道唔錯。要讚下呢度啲點心，係即叫即蒸或者即叫即炸，嘢食夠晒新鮮熱辣，做得幾有heart。 價錢都算合埋，茶錢$4位，又唔駛加一。 不過茶只得普洱一款，唔係人人啱嘛，最好加多一款茶迎合大家啦。