嘉興餐廳

營業中

休息中

呢間茶記，喺10多年前經常來往西環嘅時候，就已經喺度，鋪位細細，但都幾多人幫襯嘅。10年後，終於搬來呢頭居住，佢依然喺度，依然咁多人幫襯，餐廳嘅裝修，冇乜點變，坐位依然咁迫，食物依然咁平。我比較喜歡食佢哋嘅特餐（即係常餐），一方面係平，另一方面係比其他嘅茶餐廳好好味（除咗個公仔麵）。今次我食佢嘅櫻花豬柳公仔麵。櫻花豬柳煎過好香，份量好多，亦都少少腍，老人家都𡁻得。公仔麵就用茶餐廳用開既頂好麵，但佢哋未免煮得過太過淋，索晒湯嘅水，公仔麵要減分。佢哋嘅牛油豬好食，好脆，炒蛋同火腿都係算得上中上水平。整體而言，佢哋嘅常餐，質素係中上，價錢係平民，絕對係可以「返啅之選」。留意到好多食評，都批評呢間食肆，我想講，可能因為呢間茶餐廳係家庭式經營，老闆同老闆娘都好似唔太志在搵錢咁，所以呢服務態度就唔似得出面街嘅茶餐廳咁殷勤。另外呢，由於佢係用半開放式廚房嘅設計，油煙就好多，嬸嬸又經常要拖地，搞到佢個地下跣到可以溜冰咁！呢樣嘢呢，可能茶餐廳就真係要留意吓啦。最後還有一個抵讚嘅地方，可能因鄰近電車廠，佢夜晚開到12點，絕對係夜鬼福音。