財記茶餐廳 (已結業)

以前財記仲喺朗豪坊嘅時候已經幫襯，而家搬左鋪，我間中都會去買外賣番屋企食。今日去完迪迪尼，剛好要番公司拎少少野，變相又喺呢頭出沒，身邊人話晏晝喺迪迪尼食完自助餐，不如晚上炒下小菜，於是我地黎到財記。新鋪細間左好多，座位都幾逼，有卡位嘅。果日食飯時間都有好多客，咁啱有人埋單，我即入。通常黎呢度我都係點呢幾味，我個人比較沉悶，身邊人都好悶，哈哈。點左蜜椒牛仔粒、椒鹽雞翼同蒜蓉炒白菜仔。呢度其實有晚餐，會平少少，但我睇過啲餸唔係好啱食，所以自己喺餐牌入面揀。舊時啲餐湯好有誠意，即日煲，冇乜味精感，我少湯水，所以幾鐘意。而家轉左黎呢邊後，我第一次堂食，個湯都一樣幾好飲，唔會好鹹，亦都唔會淡茂茂。蜜椒薯仔牛仔粒，以前好鐘意喺另一間菜館食，但佢執下又一間，執下又一間，都少去左。財記嘅蜜椒牛仔粒都ok嘅，又唔算話好貴，又幾大碟，薯仔都幾入味，牛仔粒亦都唔韌，唯獨個「蜜」味可以再濃啲，我鐘意食落去有少少辣之餘，仲食到蜜糖嘅甜味。椒鹽雞翼，我試過幾次買外賣番屋企食，路途遙遠，凍左真係好難食，都係堂食穩陣。雞翼炸得幾香口，熱辣辣，椒鹽味道唔重，主要靠面頭嘅炸蒜，食落幾香脆，我收貨。炒菜就真係貴啲，加少少錢