A5和牛真係肉眼可見嘅高質！大大塊足足有五六塊，雪花紋理靚到似藝術品，脂肪分布均勻。放係甜甜嘅壽喜燒汁度輕涮十秒就熟，裹上日本蘭王蛋液，入口即溶，脂香同醬汁鮮甜完美融合，絲毫唔油膩。
雞肉壽喜燒都好出色！雞肉厚切彈牙，吸飽咗濃郁嘅壽喜燒汁，咬落juicy多汁，鮮味十足。配菜仲有豆腐、香菇、茼蒿，吸盡湯汁精華，解膩又爽口。
店鋪位於荃新天地2期門町市場，環境乾淨企理，新店人氣旺但服務好快手。圍住熱氣騰騰嘅鍋邊邊煮邊食，暖笠笠超適合依家嘅天氣。呢個性價比真係冇得彈，下次要試埋佢哋嘅燒牛兩食，鍾意壽喜燒嘅朋友快啲沖～
