就是偏偏喜歡你 (已搬遷) 新店位置

呢排突然好想食港女下午茶☕️於是就上openrice睇吓有咩好食，跟著就見到呢間好多好評嘅花系打卡餐廳 — 就是偏偏喜歡你。呢度2人份量嘅下午茶set價錢為$398加1，包2杯飲品。本身我哋只想嚟打卡，但無諗過個set嘅食物質素都非常唔錯，我哋喺各方面都好滿意！tea set上層係甜點，分別有2款macaron、2款蛋糕🍰；中層係鹹點，有芝士菠菜酥、魚子撻、素菜卷；下層係餅類，有煙三文魚多士、2款鬆餅。各款食物都出奇都好味，而且唔會好漏同過甜，好啱怕肥嘅朋友仔嚟！我特別鍾意個鬆餅，因為佢個皮好脆身，偏向似曲奇皮，入面嘅麵粉又唔會過多，啱啱好，唔會食完就食唔到其他嘢！環境方面，餐廳係以花系為主，每一張枱都圍繞着好多花，其中仲有一兩張枱係鳥籠做主題，非常特別！不過最特別嘅呢，就係呢度有隻bunny兔仔，佢非常活潑，成日喺枱下面周圍跳嚟跳去，好鬼得意！其實食下午茶都未必需要去酒店食，呢度都係一個唔錯嘅選擇！