芒果腸粉 ($35)
條腸粉唔似平時嗰啲係用椰汁造嘅，呢個係真係似飲茶嗰款腸粉皮喎，仲要加埋芝麻，像真度更高！晶瑩剔透內裡透黃，粉皮夠韌唔易散，仲要超滑溜，真係唔小心就會瀡咗落喉嚨！再落啲芒果汁，味道更鮮甜到爆！
熱椰皇蛋白燉奶 （＄34）
椰香仲要撲鼻而黎，椰皇本身已經芳香清甜，加上香濃嫩滑嘅蛋白燉奶，徘徊在似椰香又奶香之間，食落滑嘟嘟又香甜；平時飲椰青好難撬到啲肉出嚟食，但食晒蛋白燉奶之後就可以好輕易咁撬起軟綿綿嘅椰皇肉呢！
綠茶心太軟 ($56)
個menu上得朱古力心太軟，喺失望之際突然抬頭見到黑板寫住有綠茶心太軟，即刻開心到個心都軟咗！心太軟旁邊有一球雪糕及紅豆，感覺上冇咁單調；一切開，杰身嘅綠茶漿緩緩流出；焗得幾好，外面微脆，入面質感似蛋糕，綠茶漿帶有微甘不過又唔會好甜；之後食返個食晒3款甜品滿足晒啦，唔開心都即時開心返
服務好好，值得一讚！
