2
睇下佢個餐牌，見到佢有多款嘅米線款式同湯底選擇，例如:花膠雞濃湯、重慶麻辣湯等。店員都好樂意介紹唔同嘅特別款式，店員推介左「招牌花膠滑雞絲米線」，自家製嘅花膠雞濃湯湯底同外面比較少有既冬陰公湯底同埋其他小食，佢好細心提醒我地，辣嘅湯底普遍都偏向辣，如果有需要可以問佢地拎碗原味湯底溝淡辣度👍
「招牌花膠滑雞絲米線」+手工芝士鮮肉餃+ 手工元貝鮮肉餃（$92） - 自家製既出品果然好濃郁同特別，亦有幾舊花膠係底，雞絲算滑味道可以，芝士餃同元貝餃都好味！值得一試！而且手工餃數量唔多，賣晒就冇。
「冬陰功小窩米線」（本身有（滑魚片、手工餃、特級肥牛片、金菇、香茅、金不換）+鴨血+鬼馬午餐肉（含糯米）（$93） - 冬陰功湯底偏酸，後勁會有少少辣，魚片夠滑，手工餃應該係各比一款，肥牛片味道正常，金菇份量算ok，鴨血大舊好味，鬼馬午餐肉含糯米呢個味道同口感幾特別，整體黎講還可以。
雞皮餃子 （$28） 4件 - 日式嘅雞皮餃子幾香口同味道都唔錯，點埋泰式甜辣醬好味！
淄博脆炸雞翼4隻（辣）（$26） - 佢個辣粉有少少似大陸燒烤會食嘅調味粉，幾惹味香口，亦炸得好脆，可以一試。
豚角煮 （$28） - 日式嘅調味偏甜，有少少似豬版嘅牛腩咁，佢伴碟嘅蘿蔔口感幾特別幾有趣，推介小食嚟，值得一試。
SANAGARIA提子梳打同 SANAGARIA蜜瓜梳打 （$10） - 外面比較少有嘅日版汽水，都幾甜。
餃子餡料份量味道都唔錯👍
總括來講，有細心既位，菜式幾特別，鍾意試新嘢嘅朋友值得一試。
