MOO MOO Plus (百德新街)

辛勞工作過後定時就會好想食美式食物慰勞一下自己，今次揀咗呢間位於銅鑼灣嘅美式餐廳，餐廳以工業風設計做主題，食物除咗招牌漢堡包之外好多熱門嘅美式食物都有，飲品嘅選擇亦都唔少，我哋揀咗：

經典之堡（$118）- 店員好細心咁幫我哋分咗兩邊，漢堡包size適中，一擺上檯已經聞到好香牛肉味，用安格斯牛肉真係唔同食法，一咬落去非常juicy，漢堡扒口感紮實，自家Moo Moo醬同配菜份量剛好唔會蓋過漢堡扒嘅原汁原味。

經典之堡

$118

香辣薯條（$42）- 漢堡包無跟薯條，所以我哋另外叫咗一份薯條另加芝士肉醬（$16），呢個邪惡嘅組合係我好鍾意嘅一種食法，芝士肉醬好澎湃仲有拉絲嘅效果，完全滿足到我嘅慾望，薯條香辣味唔算重，所以唔太食得辣嘅人都會食到。

芝士肉醬香辣薯條

$58

另外我哋叫咗個雞翼拼盤8隻($88) - 揀咗水牛城雞翼配鹹蛋黃雞翼，水牛城雞翼口味正宗，酸酸辣辣好醒神，鹹蛋黃雞翼外脆內嫰、咸香惹味。雞翼隻隻都好大隻，兩個人食8隻已經非常滿足。多D人可以叫大拼盤，$108有12隻可以揀3款口味仲抵食，見到隔離枱大大碟，打卡一流！

水牛城雞翼配鹹蛋黃雞翼

$88

我哋兩個人食咗以上份量已經好足夠，整體嚟講呢間餐廳嘅性價比好高，氣氛熱鬧輕鬆，服務亦都好好，好適合一班朋友嘅聚會。