妹記佩蘭鹵水鴨專門店 (已結業)

話說前排，又有啲事入咗香港仔做嘢，咁食晏時就坐兩蚊船去大街搵嘢食，本身就想去食記嘅，但點知去到摸門釘咁岩無開，於是就去咗呢間「妹記佩蘭」食鴨鴨喇。久聞大名，當然要點個滷水鴨試啦，咁個人鐘意麵食類多啲，所以就叫咗瀨粉。問一問轉脾，原來係需要加錢嘅，咁山長水遠，當然要食好啲啲，所以叫咗滷水鴨脾瀨粉。雖然人比較多，所以等候需時。鴨鴨到了，基於太餓嘅關係，差啲就唔記得影番張相。味道確係有保障，睇個湯同隻鴨嘅色水就知道好入味，唔係超咸亦唔會過淡，味道好適中唔騷，配起比較淡味嘅瀨粉都好夠味，相當開胃。雖然睇落份量唔多，唔好以為會食唔飽，但瀨粉其實都幾容易有飽腹感。有啲飽，同場依然加演炸雲吞半打，雖然比較後期先到，但新鮮熱辣又香脆嘢仍然係令人愛不惜口，飽肚都要食番幾件。總結，係比較人多可能要花啲時間等待，但食完之後，覺得不枉此行。