源記甜品專家 (已結業)

好多老字號經歷左唔同年代到而家都依然屹立不倒，當中又有幾多保持到水準呢。當然啦，好多食客除左食味道，仲有樣野叫情懷，都一樣食得的。知道好多人都鐘意西環嘅源記，襯過左海喺西環食午飯，就飯後一糖水。呢個鋪位重新裝修過，座位闊落又光猛，最重要當然係價錢都一直提升，以中式糖水黎講，價錢都昂貴，人地賣緊廿零蚊碗嘅，呢度都接近四十了。餐牌供應桑寄生蛋茶、蓮子茶、紅、綠豆沙、芝麻糊、杏仁露等，唔少得招牌雞蛋糕，糖水定價$26-40，夠好多人食個飯架喇。通常來來去去點嗰幾款，我地亦不例外，點左桑寄生蓮子茶、合桃露。桑寄生蓮子茶 $36可以加雞蛋，但我唔係太想食。糖水依然用傳統湯碗，其實我屋企都仲用緊。下面有銀盤隔熱，而家比較少見。桑寄生呢款藥材價錢唔貴，毛利都幾高，好在味道唔錯。入口甘香，甜度唔高，熱辣辣，相當養生。蓮子大大話話有十幾粒，大粒而完整，唔會煮到太腍身，仲有少少咬口，帶甜。整體真係比其他糖水店做得出色，食完呢個糖水好似寧舍舒暢清香合桃露 $36合桃露相對失色，並冇聞到明顯合桃香，一放匙更入去，就感覺到佢比較稀身，水廖廖咁。濃稠度不足，入口只有很淡合桃味。