無肉食 (如心廣場二期) (已結業)

「無肉食」不嬲都做開自助餐，但因為疫情關係，變左做半自助餐，即係揀完一個主菜再加自助餐。話明半自助餐，喺自助餐枱上面既菜式比正常少左一大半，以炸物同涼拌菜為主。主菜方面都有幾多選擇，不過vegan既就唔多，所以vegan們都係去返中環既全素分店會好啲。四川辣子素雞既雞係猴頭菇，略嫌有啲太乾，如果入面可以嫰滑啲就好。調味辣辣地又有啲孜然味咁，都幾有四川風味。咕嚕肉都似係猴頭菇，依個跟埋汁就比素雞好味啲。個味都係平時啲咕嚕汁味，唔係好知點解會係老北京口味。半自助餐既涼拌菜都幾多，最估佢唔到係有珊瑚藻，平時好少地方有得食。珊瑚藻係海中既燕窩，可以補充下植物膠原，好正架。炸物都係平時果啲春卷、天婦羅同煎堆果啲，個煎堆伏味甚濃。咬開左個煎堆，發現入面係實心既咁係咪即係拎左粒湯圓去炸？做返空心既會好啲。最後黎多碗養顏糖水，有桃膠又可以再補充膠原。荃灣既素食餐廳越開越多，有素年啦、Green Common同悠蔬食，更加有黃到金既素悅軒，無肉食要比心機做好啲先得喇。