威風百麵 (已結業)

麻辣手撕雞撈寬薯粉 $39 連甜品外賣自取+$2，可以用whatsapp落單，超級方便。外賣袋唔係普通白色膠袋，係印左佢嘅logo，靚又實正，外賣盒好硬正，唔會周圍漏，餐具都個印logo嘅袋包住，有一對好硬正嘅木筷子膠匙羹紙巾牙籤，好齊全，仲有一個泥頭鏟膠羹for甜品。其實成件事有啲多餘，但係感覺好高級。講翻碗粉先，手撕雞份量正常，但乾柴，撈埋麻辣汁都係偏乾，配料有榨菜絲，青瓜絲紅蘿蔔絲，脆花生，份量唔多。寬粉同我想像嘅寬粉有出入，好似窄咗啲😂。麻辣汁辣但唔麻，比較單一嘅辣汁，冇咁層次感，一嚟就得個辣字，不過以$39嚟講，其實係絕對可以接受。朱古力慕絲 (跟餐)慕絲面頭有層黑朱古力啫喱，韌又彈牙，朱古力慕絲有真朱古力味，口感介乎慕絲同布丁之間，質感順滑，不過同面頭果層啫喱唔係好夾。