左邊牆上有勁多塊米芝蓮獎牌，能夠連續 7 年獲得米芝蓮推介，點都有翻一定實力嘅！一入去就由店員探體溫，每人派咗塊酒精消毒棉，感覺衛生啲。依道係小店，但座位之間唔逼，坐得幾舒服。
叉燒係以 66 度低溫烹調，肉質嫩滑，薄切但口感油潤唔會話好少咁，圍住個碗咁擺好靚𠻹呢
依道主打嘅九州熊本風豬骨湯底濃郁細緻而不濁，拉麵比較幼身煙韌，掛湯力高。唔係人人都鍾意筍嗰股濃烈嘅味道，依道先用醬油將筍煮過，易入口好多，唔會搶咗拉麵嘅鋒頭。
沾麵湯汁係用魚介汁熬成，內有京蔥同筍乾等等，十分惹味！
沾麵就係粗麵條，可以沾到多啲湯汁，有冷暖麵選擇，我就揀咗冷麵，食起嚟更加彈牙。配菜好豐富，有叉燒、日本半熟蛋同幾塊紫菜。放沾汁嘅瓷碗好厚重，啲汁食到最尾重係好暖和。
通常拉麵店都有餃子食，雞皮餃子我就無食過喇，的確係用雞皮包住肉餡㗎，雞皮香口到無得頂，入面好多肉汁唔肥膩喎。依家做緊優惠 $3 隻真係好抵食，每隻外皮都香脆！
好耐無食過章魚燒，炸八爪魚球圓碌碌幾大粒，八爪魚粒有咬口，絕對唔係得粉漿
海量嘅柴魚片切幼咗，無咁易跌落嚟，連埋啲沙律醬同照燒醬好正，兩個小食水準都好好～
