百份百餐廳 (已結業)

今日放假，女友難得黎東區，同佢行下，去左藍灣。女友叫左個勝瓜什錦泡飯，我叫左個上海嫩雞煨米線。泡飯好快，三分鐘上到枱，大大碗，味道正常有味精，勝瓜新鮮，菌類菇類都夠味。但我碗米線就等左好耐，約莫20 分鐘 （正常7-8分鐘有得食是常識吧）。終於，米線上到枱，我已經餓到要食住女友碗野充飢。一望碗米線，心諗咩事。成個紅海咁，超多蕃茄。我眉頭一皺，馬上𥄫一𥄫張單，無錯咼，係落左一碗「上海嫩雞煨米線」，我舉手叫侍應，問係咪黎錯左，位侍應話去問問。一陣返黎，竟然同我講「上海嫩雞煨米線係有蕃茄」嘅。嘩我當堂嚇一跳！事關佢講既野係咁超乎常理，但佢又講得咁理直氣壯。咁我好客氣咁請佢可否入去廚房問問，佢有啲為難，但都去左。出到黎又有另一套說法，話：「因為最近廚房轉左師傅」又加一句：「碗米線你一係食，一係就同你取消左佢。」聽到呢到，我一向食完蕃茄先會發作嘅胃痛竟然俾佢引發左，伴隨少少怒意，谷左個笑容出黎同佢講：「咁取消佢啦唔該，因為我唔食得蕃茄架。」講完，我女友已經食完碗泡飯。渣渣林埋左張單，過隔離麥當勞買個包食好過。