車仔麵之家

營業中

休息中

有次同Honey喺隔離街食法國菜，食完開車走嘅時候經過車仔麵之家，Honey就話我知呢間車仔麵好食過我哋喺銅鑼灣食開嗰間，但唯一缺點就無位坐，不過我嘅諗法係，只要夠好食，立食又如何！所以咁啱去開灣仔，就嚟試吓呢個車仔麵。估唔到星期六都咁多人，門口排長龍，企喺店入面食又無位，但都阻唔到我試吓呢間車仔麵。叫咗油麵底，餸就揀咗牛腩、冬菇、魷魚、豬紅同埋豬腸。叫牛腩都會有埋牛筋，牛筋夠淋，但牛腩未算最淋；冬菇夠滑同入味；豬紅都入味幾好味；豬腸都好味，不過我個人就嫌太多肥膏；魷魚好味！而個辣醬係我最欣賞，真係好好味！食到好味嘅嘢，就算企喺後巷食都無所謂啦！