新沙洞大排檔 (大政街)

營業中

休息中

放工約埋同事去大角咀搵食，行入橫街見到新沙洞大排檔五光十色嘅門面，即刻吸引我哋嘅目光，所以二話不說就衝入去。入面環境唔算好大，估唔到平日夜晚都會座無虛席，出面仲有人喺度等位，好彩我哋進場時間尚早，可以佔據有利位置。韓國菜通常都會有泡菜，而新沙洞另外仲有芽菜做前菜，其實份量係多一倍，不過因為太肚餓，食咗一半先記得影相😅😅依家食韓國菜又點少得食炸雞，我哋就揀咗柚子味嘅新沙洞炸雞，韓式柚子醬上再灑上芝麻，簡直係令人胃口大開。炸雞外皮鬆脆，肉質嫩滑，配個甜甜酸酸嘅柚子汁，可以減去油膩感，食多幾件都得。宮廷燉牛肋骨鍋嘅牛肋骨大大件，配有豐富嘅配菜一同燉煮，我就最鍾意佢嘅蘿蔔夠晒入味，個牛骨湯仲好甜，份量好大，如果落埋個烏冬食應該仲正。由於我覺得牛肋骨湯係需要配澱粉質，冇米氣到肚真係搞唔掂，所以就揀咗個炸蝦芝士紫菜飯卷。大大件嘅飯卷賣相吸引，食到脆炸大蝦之餘又有香濃芝士及沙律醬汁，頓時豐富了味覺享受。秘製辣醬炒魷魚嘅每條魷魚都軟綿綿好易咬，配上辣辣嘅醬汁，刺激味蕾，另外仲可以用生菜包住食，即刻解去辣度，真係越食越想食。飲品方面，我哋揀咗二人份量嘅草莓牛奶配蜂巢特飲，粉紅色嘅賣相絕對係女士們嘅最愛。