鬼滷 (已結業)

先講明，係一間唔會有下次嘅餐廳。炸普寧豆腐全餐食得過嘅食物都已岀現在上面張相。豆腐炸得脆卜卜，內裡亦非常嫩滑，調味也很好，配搭韮菜水又多一層口感，係唔錯嘅。另外，相中嘅辣椒油亦係唔錯嘅，响之後嘅菜式起咗極大嘅幫助。呢個滷水非常一般，只有鵝腸爽脆有滷水香，而豆腐，鵝件都冇乜味，唯有配辣椒油食，再講，佢個辣椒油係好食嘅！！重點嚟喇，個豬仔脾係有雪味嘅，完全唔得，非常恐怖。。。蠔仔粥，又一冇味之作。湯頭-大地魚嘅味道？方魚嘅味道？都係搵唔到。蠔仔-用細嘅蠔係我鍾意嘅，飽滿，但完全冇鮮味，仲過火至質地偏韌。粥面嘅炸乾葱？旁邊嘅菜脯？點解用問號，因為我真係估係乾葱同菜脯。當日入座時，有話我哋知當日不供應慢煮菜式，餐牌有一個大項係慢煮嘅，咁好正常明白係冇嘅。但係响滷水嘅大項底下有一款慢煮鹽香雞，咁就問下有冇啦，員工話問下先，然後回覆“冇嘅”，聰明嘅你睇到呢度，都估到我見到其他後嚟嘅枱係有得食慢煮鹽香雞啦！埋單四百幾，有種比人呃嘅感覺。