MOS Burger

OT收工晏咗，本來想食shake shack，但諗諗下都係食mos會輕盈啲，大概7點半嚟到都幾少人，前排上網見到個壽喜燒漢堡好似幾得意咁就試下啦！

收到個下我嚇親，牛肉呢？原來因為隻蛋太大，其他配料跌曬去後面。都唔緊要，我手動擺翻好先食。

擺個陣我已經摸到隻蛋係超凍，其他料食個陣都係會跌，我大概食咗半個麵包配水煮蛋（無味）。

食完隻蛋，我得返啲生菜洋蔥配一小塊牛肉，可能因為隻蛋好凍，上面結咗一粒粒油脂。壽喜燒嘅精髓係蛋汁，我見有啲網友隻蛋會有汁，而我個隻係熟蛋，可能無汁嘅關係，超級鹹！

出啲奇趣新產品的確可以引人去試，但呢啲咁失敗嘅產品只會趕客！雖然呢餐真係好輕盈，但我下次都係食返其他啦！