低調高手大街小食

基本上係我每次去筲箕灣都會食，唔食嘅原因都只係因為間店唔開門。之前係其他食評有提過，我係一個好鍾意雞蛋味甜品嘅人，而雞蛋仔係其中之一。

我唔係專業食家，所以無辦法評論係咪最正宗嘅雞蛋仔，但呢間雞蛋仔真係非常啱我口味。我知道有啲人比較鍾意較麻糬口感嘅雞蛋仔，唔鍾意脆嘅，覺得脆嘅雞蛋仔食落冇咁實在，但我係一個好貪心嘅人，對我嚟講一粒好食嘅雞蛋仔要有齊曬兩種口感，而低調高手就做到啦！

佢一粒雞蛋仔入面，一半係脆過蛋卷，一半係雞蛋仔獨有嘅煙韌口感。蛋漿唔係一味得個甜字，蛋味香濃，真係我食過好高質嘅雞蛋仔。