Oasis Corner (已結業)

觀塘返工嘅好處係可以周圍食下唔同小店，尤其工廈嘅小單位，真係好多唔種類嘅野食，要令人留下深刻印象都唔容易。誤打誤撞去咗呢間餐廳，外面睇冇乜特別，位置仲咁偏僻（果層行到最入），但裡面成大幅牆都係手繪畫，又有屬於自己嘅可愛貓貓logo同自家製曲奇，相信呢間餐廳店主都係充滿夢想嘅年輕人（我估～)放假食太豐富所以都係想食個簡單健康lunch，叫咗個韓式慢煮豬扒三文治加杯芋頭鮮奶。其實我除咗isaac toast之外都未食過韓式三文治，所以唔知應該係點嘅樣，但呢個三文治確實唔錯，秘製醬汁真係好得，加咗啲黑椒少少惹味同豬扒好夾，麵包烤過同熱辣辣滑蛋加埋西生菜好好食（最緊要熱食！）。雖然只係方包size嘅三文治但啲料真係太多了所以對女仔黎講係超級飽肚。另外我都係第一次飲芋頭鮮奶，第一啖好多芋頭雪糕feel。飲落唔太甜但好多芋香，仲食到少少芋頭粒，冬天飲真係會有幸福暖笠笠嘅感覺。