地理位置方面，呢間餐廳係APM附近嘅觀點中心，上電梯上一層就搵到呢間韓式餐廳，佢哋自成一角，成層就只得佢一間餐廳。
餐廳範圍以外，佢哋亦都將一啲梳化櫈放咗喺餐廳出面，可以坐到更加多嘅客人。係㩒完飛之後，我哋就喺外面排隊等候埋位，前面大概8至10個人左右等候緊，但係約15分鐘就可以入得去。
先講一講第一次點過嘅野食：
熔岩芝士炸雞麵包 $128
先講一講個雞，個人覺得比起韓國嘅炸雞仲要好味，脆脆嘅外層，包住裏面嫩滑嘅雞肉，而且咬落去之後，外面嘅油份亦都淺出嚟，口感同埋味道都一流！炸雞可以選擇點麵包裏面嘅芝士嚟食，芝士唔會太傑，淡淡嘅芝士香，配合雞肉來食更加好味！但建議起碼有四個人先至好叫呢個黎食，因為佢係超濟既，飽肚程度五粒星滿分有八粒星，但都算幾好味，個包既外層仲香脆，裏面嘅麵包亦都唔會好硬，多人黎可以試一試佢，挑戰一下食唔食得晒。
溫泉蛋肉醬黑雨拌飯＄58
1
佢會俾埋一甖韓式辣醬你，連埋肉碎加埋上面嘅溫泉蛋撈埋一齊，令到下邊嘅飯都更加富有口感，亦更香更滑！＄58有咁大嘅份量，質素亦都非常唔錯，推薦你地叫呢一個！
莫之圖青瓜沙冰＄42
好清新嘅一個沙冰，雖然佢話係青瓜，但係我覺得比較似蘆薈嘅味道，食完其他咸野之後，飲呢個都幾享受！
草莓迷醉雪花冰＄68
1
呢個雪花冰都幾足料，見到上面全部都係士多啤梨，大致上都唔酸嘅，冰亦都磨得好碎，中間亦都加左一層一層嘅士多啤梨醬，甜甜嘅感覺一路keep住去到最尾。
接住落嚟係第二次嘅用餐體驗：
拉絲芝士BB豬肋骨拌泡菜炒飯＄88
又係一個飽肚之選，豬肋骨整得好林，好容易咬得開，另外將泡菜撈勻啲芝士同埋紫菜，小小辣嘅惹味，紫菜香亦都令食慾大增！
牛肉水冷麵＄68
呢個失色左少少，可能因為本身食唔慣佢個種酸味，酸就酸唔得晒，但係個面係幾彈牙幾煙韌嘅，而且個牛原來係韓燒個種嘅味道，幾特別，但係可惜一大碗入邊只係得四細塊。
黑森林朱古力奶油年糕吐司＄48
其實呢個都幾飽肚，因為麵包中間嗰層係夾住年糕嘅，如果正餐食得唔係好飽，甜品食呢個其實都幾夠數，吐司係整得幾脆既，面層嘅朱古力粉加埋朱古力粒加埋起嚟，成個口感亦都非常之好，味道亦都好豐富！
Oreo沙冰＄42
1
同上面沙冰嘅水準差唔多， 都好好！幾香朱古力味，建議快啲食左上面個Oreo同埋個朱古力卷，唔係嘅話就會浸到林晒。
每次平均一個人都係100幾十蚊，但係都食到好多野，加上個份量都唔少嘅，而且成個環境都幾舒服，可以同埋自己嘅另一半喂試一試，相信對方都會喜歡！
