海南少爺 (已結業)

喺海港城行完街，見到呢間海南少爺環境唔錯，價錢合理就入去試試啦～好好彩坐咗喺望到海嘅位置，一坐低店員就上咗一壺荔枝烏龍茶，飲落真係有陣陣嘅荔枝香味喎～見到佢叫海南少爺所以就叫返一客招牌海南雞飯，加錢轉咗雞髀，無骨啖啖肉，雞肉滑身，仲有齊三色醬料比你點～馬拉盞炒通菜，份量都唔少，微微香辣～另外叫咗雞絲青瓜夾酥餅，調味適中，餡料清爽～小食要咗金絲網蝦春卷，外脆內軟，口感有少少似餃子，入面仲食到啲粉絲～甜品叫咗海燕窩燉椰皇，食到有一絲絲嘅海燕窩，同埋預先起好咗嘅椰皇肉～飲品方面要咗一杯椰子菠蘿沙冰，好啱夏天好清新呀！