今次已經係我第三次嚟，餐牌裡面好多菜式嘅賣相都好吸引，每次嚟都覺得花多眼亂，千挑細選最終揀咗以下幾款。
1️⃣ 紅點三文魚他他🐟 $145
嘩！意想不到的美味！（絕無誇張！）三文魚新鮮富彈性，牛油果🥑質感超軟綿，亦令整體口感更厚滑。特別欣賞個油醋汁，酸酸哋好開胃清新，加入青檸汁令三文魚鮮味加倍🤤。我老公平時唔鍾意食牛油果，但佢今日竟然爭住食。我哋亦好鍾意個法包🥖，包邊超香脆，中間則煙靭，正！
1
2️⃣ 馬塞龍蝦海鮮鍋🦞 $368
先試一下個湯汁先，好掂😍！佢帶有香濃嘅龍蝦同菜嘅鮮甜味，我同老公都好鍾意❤️。青口、蜆同魷魚🦑都好新鮮，肉質彈牙。龍蝦鮮美香甜，肉質厚實，爽口富彈性，正！（早知加$60要多半隻！）不過略嫌煎魚柳有少少🤏🏽煎耐咗，皮好香脆但肉有少少乾身。
3️⃣ 法國油封鴨腿🦤 $195
好耐無食過鴨腿，亦唔係好多地方有得食，於是今晚決定叫嚟試吓。哩個決定做得無錯🤩，鴨腿肉質細嫩鬆軟，特別欣賞佢層皮，香脆之餘仲散發住豐富油香😋，加埋肉桂蘋果一齊食，香甜可口，味道昇華！
4️⃣ 椰香焦糖烤布蕾🥥 $78
本身係椰香控嘅我表示食到停唔到口！每一啖都散發住淡淡清香嘅椰子味，實在令人心情豁然開朗☺️。烤布蕾質感厚滑，加上一層忌廉，味道更滑溜清香。
5️⃣ Soothing 法國茶 $45
老公點的，花茶味道清香，飲落去好舒服，可一解工作嘅壓力。
7️⃣ Monbazillac 法國甜白酒 $75
我好鍾意飲甜酒，哩杯真係啱晒我口味。易入口，清甜帶果味，正🥂！
一頓美好嘅晚餐，為星期一劃上句號。
