鬼滷

營業中

休息中

今日同屋企人去咗銅鑼灣食晚餐，餐廳環境好好，驟眼睇以為食西餐，原來係食滷味！佢哋嘅前菜竟然係爆谷，不過又甜又脆，又真係幾適合作為開胃小食。椒鹽普寧豆腐，豆味好香好滑溜，外脆內軟，椒鹽夠曬惹味。可以試下點韭菜鹽水，鹹鮮微辣，風味獨特。潮式方魚BB西蘭花，西蘭花好爽口，方魚細細粒容易咬。潮式滷水拼盤，揀咗滷水鵝肉、鵝腸、豬仔脾，鹵水用咗蜜棗、八角、肉桂等調味，上菜嘅時候用火熱住保暖，非常貼心。拼盤都有鹵水豆腐，相對普寧豆腐硬身，係另一種風味。第一次食鹵水豬仔髀，感覺新鮮，肉質幾嫩，鵝腸爽口，鵝肉結實又唔會太肥。蘭王蛋蠔餅蠔餅，用咗蘭王蛋，蛋味好濃郁，上面加咗少少木魚，即刻變咗日式風味，好似食緊大阪燒咁。蠔仔又多又大粒，可以做到一啖蠔一啖餅，好過癮。韮菜鴨血，聞落好香麻辣味，但又唔會太辣，反而香麻味會慢慢滲出嚟，點到即止。鴨血好彈牙，加埋新鮮嫩滑嘅韮菜，非常出色。