雲南老巷

雲南老巷係典型街坊小店，之前食過幾次都覺得好食，所以今次又返嚟encore。牆身裝飾、餐牌同碗都極富仿古風味同雲南元素，幾有特色。佢係長期爆滿，店面真係好細，得十幾個位，座位之間非常迫，坐得唔太舒服，係一食完就會想走嗰種。

今次叫咗走辣版酸辣湯米線，加咗竹笙、十三香雞肉同生菜。湯底一如以往有佢獨特風味，鍾意嘅會覺得好有雲南感，唔鍾意嘅可能會覺得有少少古怪臭味。雞肉冇雪味，仲有啲特別香味；竹笙吸晒湯汁，味道幾出色，配料份量都足，整體保持唔錯水準。不過米線質感有啲唔同，好似冇之前咁幼身同嫩滑，唔知係煮得太耐定係轉咗款。

可能因為店舖偏老舊失修，餐廳彌漫住一陣有似米線湯又似噏味嘅味道。如果對環境整潔同空間味道有要求嘅人，可能要考慮清楚先再試。整體而言，湯底富有特色，但未必人人啱口味。