民泰四七 (已結業)

黃埔開通左地鐵站後，方便左好多。以前只有小巴同巴士，而家交通方便左，多左人流，餐廳都多左。係一品火鍋隔離，就開左間東南亞fushion菜，叫民泰47，裝修與別不通，同周邊既餐廳比較起黎別樹一幟，決定試下。餐廳內部燈光昏暗，唔睇以為係高級餐廳。睇下餐牌，原來都唔算太貴，都算適合黃埔紅磡區價位。有趣既係餐廳名就係街名！餐廳新開張二個月左右，所以選擇唔算多，但前菜，主菜同甜品都齊備。餐廳位置空曠，唔會太逼，都坐得好舒服。因為我地食晚餐，每張台上面都有個蠟燭，好浪漫！我地2個人，叫左2個前菜，2個主菜。分別係蕃薯條，黑毛豬奄列，豬仔骨同signature鍋飯。蕃薯條帶甜，配蛋黃醬，同一般薯條既咸味不同。黑毛豬碎同薯仔裹入蛋塊，配上以健康為賣點既薯片，好特別，之前未係其他地方食過！烤豬仔骨配上咸酸菜，油膩既感覺被中和。鍋飯係西班牙海鮮飯加上香料，臘腸同醬汁，辣辣地，幾開胃。美中不足既係餐廳剛開業，未有酒牌，鍾意飲酒既建議先打電話去問下有酒牌未。值得一提既係餐廳服務好好！會經常留意你夠唔夠水飲，食物味道如何。平民價錢，高級裝修加上合水準既食物質素，值得一試。