釜之魂釜飯專門店 (淘大商場) (已結業)

今日經過淘大花園，見到呢間網上好多介紹嘅釜飯，仲要有鰻魚，就入左去食喇！髒髒炸香蕉呢個好有驚喜，有一層好跪嘅外層，包住半溶狀態嘅香蕉，再灑上一層可可粉，口感同味道都好有層次感。吉列牛舌外層嘅炸漿唔會太厚，牛舌比我想像中厚身，肉汁都算多，又唔會好似出面好多舖頭咁，炸到好乾身。黑松露玉子燒玉子做到平時食開嘅層次感，亦有應有嘅甜味，黑松露醬嘅味道剛剛好，唔會遮蓋玉子嘅甜味，平衡感做得好好。汁燒牛肉釜呢個性價比其高，每粒牛肉大約兩隻手指頭嘅大小，有成十粒左右，每粒都好多肉汁，師傅只用左黑椒同鹽去調味，完全感覺到牛肉本身嘅肉味，真係比想像中好食好多！鰻魚(金魂)極釜本店嘅主打菜就係鰻魚，店員都好熟悉菜單，好快就同我地介紹唔同款式嘅鰻魚釜，唔同部位都會有唔同嘅口感，我就揀左最油嘅腩位，果然無令我失望，油而不膩，份量都好好，都有成一個手掌嘅長度，啲汁都唔會好多，仲有少量野菜配搭，都相當豐富。