北海道脆皮雞排 (已結業)

豪大大雞排去台灣玩都應該有食過，不過相信好多朋友都有同感，雞排肉質偏嚡，而且愈食愈口乾，純粹只係巨大作綽頭。進駐旺角後味道依舊，身價暴升一倍，但仍然有唔少人甘心排隊，而旺角中旅社斜對面，就有北海道脆皮雞排店要跟豪大大鬥一下，食落味道果然更優勝，縱使「熱氣」亦在所不計了！北海道脆皮雞排店名雖然有「北海道」三隻字，但實際上跟日本完全無關係，反而跟豪大大雞排一樣，以台式手法製作，用最熱氣最邪惡嘅味道吸引顧客。除左招牌脆皮雞排同巨無霸Ｇ脾排外，亦有魷魚鬚，軟殼蟹，花枝丸等，款式都幾多，今次要試嘅係Ｇ脾排...Ｇ脾排$23一塊，價錢比起豪大大平少少，同樣都係即叫即炸，新鮮熱辣。呢度相比下輸在人氣唔夠勁，所以都唔駛等好耐就有得食～！呢度有十種唔同風味嘅調味粉俾大家選擇，心多多甚至可以雙拼，而我就選擇左胡椒配梅子，貪呢個組合夠醒神！熱辣辣Ｇ脾排先剪開八件再入袋，寒風下食特別滋味，外層炸得好香脆，梅子粉跟炸粉漿好匹配，相當惹味。而口感方面，跟豪大果塊Dr Martens Airwair鞋底完全截然不同，雞肉部份夠嫩滑，而且內裡嘅肉汁保存得好好，炸功相當唔錯！油膩在所難免，但整體黎講真係值得一試！