Han Ban Korean Restaurant (已結業)

疫情下幾日冇出街，今日出開新蒲崗攞嘢諗住順便買啲外賣返屋企嘆。原本想買629雞蛋仔，但冇開，唯有搵其他野食。點知就係附近發現呢間新開韓國菜餐廳，疫情下真係拍烏蠅，猶豫之際發現老闆原來係韓國人，突然覺得可以一試。佢門口有玻璃窗可以睇到佢廚房，調味料全部韓國入口，韓國人煮，果刻心諗真係正宗韓國菜😂應該唔會差得去邊叫左個拉麵年糕同辣牛肉湯，雖然外賣，但份量真心多，同堂食冇分別（最近疫情叫多左外賣，有啲餐廳份量真係會減少），個牛肉湯仲跟白飯同配菜，幾抵食。 原本最想食紫菜飯卷，但可惜佢賣晒。返到屋企試，雖然拉麵索晒水變一舊，要自己加啲水鬆開佢，但味道唔錯，年糕仲好軟。辣牛肉湯都好味。下次再去新蒲崗一定再試其他，希望佢挨得過疫情啦。