隨變燒烤麻辣雞煲 (已搬遷) 新店位置

第一次聽呢個餐廳名，我以為叫隨便。呢間餐廳係冇得訂枱所以每一次來都係未夠6點等佢開門。雞煲嘅麻辣味十分之獨特，我揀咗小辣。食完個雞煲之後我梗係再加嘢食繼續打邊爐啦！我每一次都會order就係佢嘅隨便粉， 好似係自家製，索晒啲湯真係一流！其他火鍋料我覺得不過不失，因為大部份都只係來貨，佢地火鍋最好嘅就係每一份都細細地兩個人食就啱啱好，可以食多幾款。叫咩食就視乎當日嘅心情而落單，冇乜嘢要推介。另外，寫到明唔俾帶外來飲品，對於飲品我唯有飲佢嘅紫貝天葵啦，不過真係好細杯，而且味道一般，成本咁低既其實可以俾大杯少少 我對面果個就叫啤酒啦仲有一次去嘅朋友要做足心理準備：就係佢哋啲枱真係好迫好迫，基本上隔離枱講乜你都聽得好清楚，而且你坐喺度嗰時，啲伙計行嚟行去佢個pat pat十次有9次都撞到你，黎得食就唔可以介意太多， 因為真係好迫！令我好喜歡嘅其實係佢啲冷盤！面頭加埋芝麻同埋香蔥，真係十分之香口。除咗雞煲之外，仲有佢嘅烤羊肉串，真係好好食好有大陸街邊嗰啲羊肉串嘅味道啊！門口個窗口係可以睇住師父即場烤！對於灣仔來講，中價嘅雞煲唔多，所以久唔久出到嚟呢邊我都會去食。