五月花港台日料理 (已結業)

12/2/2009 (星期四)今日 Lunch 同同事一齊去五月花食飯，呢間餐廳係樓上舖，係一樓，地方寬敞，環境唔錯都幾好坐，仲有卡位，午飯時間都有位，唔駛先訂位。我地一行五人，侍應帶我地去一個有窗口的卡位，可以望見對面街的德華公園，我最鍾意坐窗口位，因為有街景睇，最啱我咁好奇的人。午飯時間有套餐供應，款式幾多，有日式便當、日式大碗麵、炒飯麵....，套餐包飲品一杯，價錢合理，由$28-$48 (要收加一)，凍飲要另外加錢($3)，如果想飲特飲或台式飲品就比多$5啦。我叫咗一個日式便當滑疍雞扒定食($40)，飲品就揀珍珠奶茶(加$5)。呢間餐廳上菜的速度認真快，我地落完 order 唔夠5分鐘個便當已經送到，個便當賣相唔錯，食物用日式便當盒分開一格格放，非常整齊，值得一讚。便當有刺身(三文魚、蝦、尤魚)、蟹子沙律、滑疍雞扒、白飯，份量頗多，刺身： OK蟹子沙律： 一般滑疍雞扒： 唔係用日式的煮法，最初以為會係全塊雞扒上，但原來係用港式茶餐廳的煮法，即係滑疍雞柳，不過都幾好食，因為加咗好多菇珍珠奶茶： 就有D令人失望，完全唔係台式的珍珠奶茶，飲落好似港式茶餐廳的凍奶茶加珍珠